بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة ُوَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
އާދެ، ފަތުރުވެރިކަމާއި، އެކިއެކި އިންޑަސްޓްރީތަކުގެ މުއައްސިސުންނާއި، ހީވާގި ވެރިންނާއި، އެކިއެކި ވިޔަފާރިވެރިން، ދައުލަތުގެ ވަޒީރުން، އެއަރޕޯޓް ކޮމްޕެނީގެ ޗެއަރމަނާއި، މެނެޖިންގ ޑިރެކްޓަރާއި، ބޯޑު މެންބަރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުދި ވިޔަފާރިތަކާއި، މެދުފަންތީގެ ވިޔަފާރިތަކާއި، އަދި މަތީ ފަންތީގެ ވިޔަފާރިތަކުގެ ވިޔަފާރިވެރިން، ވަޑައިގެން ތިއްބެވި ދައުލަތުގެ އެހެނިހެން މުއައްސަސާތަކުގެ ވެރިންނާއި، މި ޖަލްސާ ދުރާއި ގާތުން ބައްލަވަމުން ގެންދަވާ ހުރިހާ ލޮބުވެތި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، އަޅުގަނޑުމެންގެ ކުރިމަތީގައި ދެންމެ މި އިފްތިތާޙު ކުރެވުނީ އިރާދަކުރެއްވިއްޔާ ދިވެހިންގެ އުންމީދު. ދިވެހިންގެ ރާއްޖޭގައި ދިވެހިން ދާން ބޭނުންވާ ހިސާބަށް ދިޔުމަކީ، ކިހާވަރެއްގެ އުންމީދެއް ކުރަންވީ ކަމެއްކަން އިރާދަކުރެއްވީތީ އަޅުގަނޑުމެންނަށް ތަޞައްވުރު ކުރެވިގެން މިދިޔައީ. އަޅުގަނޑުމެންނަށް ކަންކަން ހާސިލުވެވޭނީ، ﷲގެ ވާގިފުޅާއި ނިޢުމަތާއެކު ކުރެވޭ ބުރަ މަސައްކަތުން. އެކުގައި މަސައްކަތް ކުރައްވަން ތިއްބެވި ހުރިހާ ބޭފުޅުންގެ ހީވާގިކަމާއި، ދިވެހި ލޮބުވެތި ރައްޔިތުންގެ ފުރިހަމަ އެއްބާރުލުމާއި، އަދި ބައިނަލްއަޤްވާމީ އެކިއެކި ފަރާތްތަކުގެ ފުރިހަމަ އެހީތެރިކަމާއި، އެންމެންގެ ބައިވެރިވުމާ އެކީގައި.
އިރާދަކުރެއްވިއްޔާ، ވެލާނާ އިންޓަރނޭޝަނަލް އެއަރޕޯޓް، ދެންމެ މި އިފްތިތާޙު ކުރެވުނު ތަޞައްވުރާ އެކީގައި، އަޅުގަނޑުމެން އެންމެން ގުޅިގެން ދިވެހިންގެ ރާއްޖޭގެ މި ތަޞައްވުރު ޙަޤީޤަތަކަށް ހަދާނަން. އިރާދަކުރެއްވިއްޔާ އެކަން މި އަހަރުގެ ތެރޭގައި، މިހާރު ހިނގަމުންދާ އެކްސްޕޭންޝަން ޕްރޮޖެކްޓްގެ މަސައްކަތް ހިނގަމުންދާއިރު، ދެންމެ ފެނުނު ގިނަ މަސައްކަތްތައް އަޅުގަނޑުމެން ޕެރަލަލީ އެކުއެކީގައި ފަށާނަން. އިރާދަކުރެއްވިއްޔާ، އެކަން ފެށިގެންދާނެ.
7 މިލިއަން، އިން އެންޑް އައުޓް ޓޯޓަލް ޕެސެންޖަރސް މިހާރުގެ ކެޕޭސިޓީ، މިއީ މިހާރު ކުރަމުންދާ މަސައްކަތުގެ، ނޫނީވިއްޔާ މިހާރުގެ ޕްރޮޖެކްޓްގެ ކެޕޭސިޓީއަކީ. އެހެން ނަމަވެސް، ރާއްޖޭގެ އިޤްތިޞާދު، ޚާއްޞަކޮށް، ފަތުރުވެރިކަމުގެ ދާއިރާއާއި، އަދި އޭގެއިތުރަށްވެސް ވިޔަފާރީގެ ދާއިރާވެސް ކުރިއެރުވެން އޮތްވަރަށް ބަލާއިރުގައި، އެއަށްވުރެ މާބޮޑަށް އެބައޮތް ކުރިއެރުވެން. އެހެންވީމާ، އަޅުގަނޑުމެންގެ ތެރޭގައި ތިއްބެވި ފަތުރުވެރިކަމުގެ ދާއިރާއާއި، އިޤްތިޞާދީ އެކިއެކި ދާއިރާތަކުގެ ބޭފުޅުންގެ އެހީތެރިކަމާއި، ފަންނީ ބައިވެރިވުމާ އެކީގައި، އަޅުގަނޑުމެންނަށް މި ކުރެވުނު މަސައްކަތުން މި ދޭހަވެގެން މިދިޔައީ.
ދެންމެ މި އިފްތިތާޙު ކުރެވުނު ގޮތަށް، އެތައް ގުނައެއް ބޮޑަށް އާދެ، ތިންގުނައަށް ނޫނީ އެއަށްވުރެވެސް ބޮޑަށް އަޅުގަނޑުމެންނަށް އެބައޮތޭ، އަޅުގަނޑުމެންގެ އިޤްތިޞާދު ކުރިއެރުވުމަށްޓަކައި މި މައި ދޮރާށި މިއަށްވުރެ ބޮޑަށް ފުޅާކޮށް ހުޅުވައިލެވެން.
އެހެންވީމާ، ދިވެހިންގެ އިޤްތިޞާދުގެ މި މައި ދޮރާށި އިރާދަކުރެއްވިއްޔާ، އަޅުގަނޑުމެން އެންމެންގެ މަސައްކަތާ އެކީގައި، މިހާރު މި ފެށިފައިވާ މަސައްކަތުގައި ހުޅުވޭވަރަށްވުރެ މަދުވެގެން ތިންގުނަޔަށް އަޅުގަނޑުމެން ހުޅުވާނަން. އިރާދަކުރެއްވިއްޔާ އެކަން ހާސިލުކުރާނަން.
އާދެ، ދެންމެ މިތަނުގައި އެމް.ޑީ.ވެސް ފާހަގަކުރެއްވި ފަދައިން، އެތައް މިލިއަން ޕެސެންޖަރުންނެއްގެ ޢަދަދު އިތުރުކުރުމަކީ، މީގެތެރެއިން ހާސިލުވެގެންދާ ކަމެއް. 25 މިލިއަނާ ހަމަޔަށް. އެއީ، އަޅުގަނޑުމެންގެ އަލްޓިމޭޓް ޓާގެޓް. އަޅުގަނޑުމެންގެ ތަރައްޤީގެ މާސްޓަރ ޕްލޭން މި ހަދަނީ، ދެ ދުވަހަކަށް، ތިން ދުވަހަކަށް ނޫން. ރައްޔިތުންގެ ފުރިހަމަ އެއްބާރުލުމާއި، ޚިޔާލާއި، މަޝްވަރާއާ އެކީގައި އަޅުގަނޑުމެން ނިންމާފައި މި އޮތްގޮތަށް ޕްލޭންގައި، މެނިފެސްޓޯގައި އިޢުލާނުކޮށް ވަޢުދުވެފައިވާ ގޮތަށް، 20 އަހަރުގެ މާސްޓަރ ޕްލޭނެއް އަޅުގަނޑުމެން މި ހަދަން މި މަސައްކަތް ކުރަނީ. އަދި އެ މާސްޓަރ ޕްލޭނަކީ، އެކަމަށް ޚާއްޞަ ޤާނޫނެއް އިރާދަކުރެއްވިއްޔާ ރައްޔިތުންގެ މަޖިލިސް މެދުވެރިކޮށް އަޅުގަނޑުމެން ހަދައި، އެ ޤާނޫނުގެ ބާރުވެރިކަން ލިބިފައިވާ މާސްޓަރ ޕްލޭނަކަށް ހެދިގެންދާނެ. އޭގެތެރޭގައި، އިޤްތިޞާދީ ކުރިއެރުމުގެ މާސްޓަރ ޕްލޭން، އިޖުތިމާޢީ ކުރިއެރުމުގެ މާސްޓަރ ޕްލޭން، މުޅި ތަރައްޤީގެ ވަށާޖެހޭ ފުރިހަމަ މާސްޓަރ ޕްލޭން، ހުރިހާ ކަމެއް ހިމެނޭ ޕްލޭނަކަށް ވެގެންދާނެ. އެއީ، ރައްޔިތުންގެ ދިވެހިންގެ ރާއްޖޭގެ، ދިވެހި ރައްޔިތުން ބޭނުންވާގޮތަށް ދާން ބޭނުންވާ މިޞްރާބު، 20 އަހަރު ދުވަހަށް ކަނޑައަޅާ މިޞްރާބު ކަނޑައަޅާ ޕްލޭން.
އޭގެތެރޭގައި، މި އަހަރުން ފެށިގެން އަޅުގަނޑުމެންގެ ޓާގެޓަކީ، ފަސް އަހަރުގެ ތެރޭގައި، މި އެއަރޕޯޓުގެ ބޮޑު ބައެއް ނިންމައި، ދިހަ އަހަރުގެ ތެރޭގައި އެކީގައި، ނޫނީވިއްޔާ އޭގެ އެންމެ ގިނަ ކަންތައްތައް ނިންމޭވަރަށް، ބޮޑު އިންސައްތައެއް ނިންމުން. އެހާތަނަށް ދިޔުމުގެ ކުރިންވެސް މިކަން ހާސިލުކުރެވޭނެ އެތައް ކަންތައްތަކެއް އަޅުގަނޑުމެންނަށް ފަހިކުރެވިގެން ގެންދެވިއްޖިއްޔާ. އެއާ ގުޅިފައިވާ ގްލޯބަލް އެތައް ކަންތައްތަކެއްވެސް އެބަ ހިމެނޭ.
އެހެންވީމާ، މި ހުރިހާ ކަމެއް އެކުއެކީގައި ކުރިއަށް ގެންދެވޭނަމަ، އަޅުގަނޑުމެންނަށް ހާސިލުކުރެވޭ ހިސާބުގައި ހުރި ކަންކަން މިއީ. އެހެންވީމާ، މި އަހަރުގެ ތެރޭގައި، އިރާދަކުރެއްވިއްޔާ މި ޕްލޭންގެ ތެރޭގައި ހިމެނޭ އެންމެ މުހިންމު، މި މަސައްކަތް ކުރުމުގައި ކޮންމެހެން ފުރަތަމަ ފަށަންޖެހޭ މަސައްކަތްތައް ފެށިގެންދާނެ. އެއީ، ސީ ޕްލޭން ޓަރމިނަލް، އެ ބަދަލުކުރަންޖެހޭ ބަދަލުކުރުން. ސީ ޕްލޭން ޓަރމިނަލް އެހެން ތާކަށް ބަދަލުކުރުމުގެ މަގުފަހިކުރެވިގެން ދިޔައިމަ، އަޅުގަނޑުމެންނަށް މަސައްކަތްތައް ބާރު ސްޕީޑްގައި ކުރިއަށް ގެންދެވޭނެ.
އެއާ އެކީގައި ހިއްކަންޖެހޭ ޖާގަ، ދެންމެ ފެނިގެންދިޔަ، 2000 ޕެސެންޖަރުންނަށް ޑޮމެސްޓިކް ޓަރމިނަލްއަކުން ޚިދުމަތް ދެވޭވަރުގެ ފުޅާ، ބޮޑު، ޒަމާނީ ޕެސެންޖަރ ޓަރމިނަލްއާއި، ކާގޯ ފެސިލިޓީއާއި، ޖެޓް ޓަރމިނަލްއާ، މި ހުރިހާ ތަނެއް ހިމެނޭ ޖާގަ މި ހިއްކަނީ. އެހެންވީމާ، އެ ބިން ހިއްކުމުގެ މަސައްކަތާއި، މި ސީ ޕްލޭން ޓަރމިނަލް ބަދަލުކުރުމުގެ މަސައްކަތާއި، އެއާ ގުޅިފައިވާ އެންމެ މުހިންމު އެއްކަމަކީ، ފުނަދޫގައި މިހާރުހުރި އޮއިލް ސްޓޯރޭޖް އެހެން ތާކަށް ބަދަލުކުރުން. އެކަމަކީވެސް އިރާދަކުރެއްވިއްޔާ މި އަހަރުގެ ތެރޭގައި ފެށި، އޭގެ ބޮޑު މަސައްކަތެއް ނިންމައި، ގިނަވެގެން 18 މަސް ދުވަހުގެ ތެރޭގައި، މި އަހަރުން ފެށިގެން، މި އަންނަ އަހަރުގެ މެދަކާ ހަމަޔަށް، ނޫނީ މި އަންނަ އަހަރު ނިމެންވާއިރަށް، އެންމެ ލަސްވެގެން 18 މަހާއި 24 މަހާ ދޭތެރޭގައި، ދޮޅު އަހަރާއި ދެ އަހަރާ ދޭތެރޭގައި، އަޅުގަނޑުމެން މި އޮއިލް ސްޓޯރޭޖް، ފުނަދޫގައި މިހިރަ ފެސިލިޓީ، އެސް.ޓީ.އޯ.ގެ ފެސިލިޓީ އެހެން ތަނަކަށް ޕްރީލޮކޭޓް ކުރުމުގެ މަސައްކަތް ކޮށް ނިންމާނަން. ނިންމައި އަދި އެއާ އެކީގައި މިހާރު މި ފެށިފައިވާ އަޅުގަނޑުމެން އެސް.އީ.ޒެޑްގެ ތެރެއިން ފެށިފައިވާ މަސައްކަތުގެ ތެރެއިން އަދި އެއަށްވުރެވެސް ފުޅާކޮށް އަޅުގަނޑުމެން ކުރިއަށް ގެންދަން ނިންމާފައިވާ ޕްލޭންގެ ތެރެއިން އެތަނަކީ އިންޓަރނޭޝަނަލް ފައިނޭންޝަލް ސެންޓަރއަކަށް ހެދުމަކީ، އެކަމަށް ފުރުޞަތު ހުޅުވައިލެވި، އެގޮތަށް އެތަން، ފުނަދޫ، އެ ލޮކޭޝަން ޑިވެލޮޕް ކުރުމަކީ، އަޅުގަނޑުމެންގެ ދެންމެ ފެނިގެންދިޔަ ތަޞައްވުރުގައި ހިމެނޭގޮތް. އަދި އެ ފުނަދޫއާއި މާލެއާ، ފުނަދޫއާއި ހުޅުލެއާ ގުޅުވައިލެވިފައިވާ ބްރިޖެއް ޤާއިމްކުރެވި، އަދި ހުޅުލެއިން، ހުޅުމާލެއިން ސީ ޕްލޭން ޓަރމިނަލަށް، ހުޅުލެއިން ސީ ޕްލޭން ޓަރމިނަލަށް، ވަށާޖެހޭގޮތަށް ބްރިޖް އެޅި، ޕަބްލިކް ޓްރާންސްޕޯޓް ނިޒާމެއް ޚާއްޞަކޮށް، ދެންމެ ފެނިގެންދިޔަކަހަލަ މޮނޮރެއިލް ސިސްޓަމެއް ޤާއިމްކުރެވި، ފަސޭހަކަމާ އެކީގައި ޕެސެންޖަރުން، ކަސްޓަމަރުން، މުވައްޒަފުން ދަތުރުކުރެވޭފަދަ ނިޒާމެއް ޤާއިމްކުރުން، ދެންމެ އަޅުގަނޑުމެން މި ތަޞައްވުރު ކުރިގޮތަށް.
އެހެންވީމާ، މީގައި މިހިރީ ގިނަ ކަންތައްތަކެއް އެއްފަހަރާ ޕެރަލަލްކޮށް ފެށޭ ކަހަލަ މަސައްކަތް. އެ މަސައްކަތްތަކަށް އިންވެސްޓަރުން ހޯދުމާއި، އެކިކަހަލަ ލުއި ފައިނޭންޝަލް ފެސިލިޓީޒްތައް ފަހިކުރުމާއި، މިފަދަ ކަންކަމަކީ އިރާދަކުރެއްވިއްޔާ، އަޅުގަނޑުމެން ހަމަ މިހާރުން ފެށިގެން ފަށަން ގަސްތުކޮށްފައިވާ ކަންތައްތައް. މިހާރުން މިހާރަށް މި ދެންނެވީ، ހަމަ މިއަދުން ފެށިގެންވެސް ފެށިފައިވާ ކަންކަން.
އަޅުގަނޑުމެން މި އުންމީދު ކުރަނީ، އިރާދަކުރެއްވިއްޔާ، މި އަންނަ އާދީއްތަ ދުވަހު އޮންނަ ކެބިނެޓް ބައްދަލުވުމުގައި މަޝްވަރާކޮށް ނިންމޭނެ ކަމަށް. "މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީ"ގެ ނަމުގައި އާ އޮތޯރިޓީއެއް އެސްޓެބްލިޝް ކުރަން. މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީ ވެގެންދާނީ، އިންޓަރނޭޝަނަލް ފައިނޭންޝަލް ސެންޓަރތައް ރާއްޖޭގައި ޤާއިމްކުރުމުގެ މަގު މިވަގުތަށް ފަހިކުރުމުގެ ފުރަތަމަ ފިޔަވަޅު ކަމަށް. މިކަމާ ގުޅިގެން ކުރަންޖެހޭ ހުރިހާ މަސައްކަތްތަކެއް ވަނީ ފެށިފައި. އެމް.އެމް.އޭ. އާއި، ކަމާބެހޭ އެހެން ފަރާތްތަކާ ގުޅިގެން މަސައްކަތް ކުރެވޭ. އަދި އިރާދަކުރެއްވިއްޔާ ރައްޔިތުންގެ މަޖިލީހުން އަޅުގަނޑުމެންނަށް މިހާރުވެސް އެއްބާރުލުން ލިބޭނަމަ، މަޖިލީހުން ފާސްކުރަންޖެހޭ ޤާނޫނު ފާސްކުރެވޭނަމަ، އެކަމަށް ދެން ބޭނުންވާ ފުރިހަމަކަން ލިބިގެންދާނެ. އަދި އުންމީދު ކުރަން ލިބޭނެ ކަމަށްވެސް. އެހެންވީމާ، ރައްޔިތުންގެ މަޖިލީހުން ފާސްކުރަންޖެހޭ ޚާއްޞަ ޤާނޫނެއް އިރާދަކުރެއްވިއްޔާ އަޅުގަނޑުމެން ފާސްކުރާނަން. ފާސްކޮށްގެން މި ދެންނެވި ގޮތަށް އިންޓަރނޭޝަނަލް ފައިނޭންޝަލް ސެންޓަރުތައް ރާއްޖޭގައި ޤާއިމްކުރުމަކީ، އަޅުގަނޑުމެން ކުރިއަށް ގެންދާނެ ކަންތައްތައް.
އަދި ހަމަ އެއާއެކީގައި، ސީދާ އެއަރޕޯޓުގެ މަސައްކަތާ ސީދާ ނުގުޅުނަސް، އެހެން ނަމަވެސް، ކޮމްޕްލިމެންޓް ކުރާ ގިނަ ކަންތައްތަކެއް މިވަނީ ފެށިފައި. ގުޅިފަޅުގައި ހަދަން ނިންމާފައި އޮތް ޕޯޓް އެތަނަށް އެކަށީގެންވާ ތަނަކަށް ނުވާތީ، ތިލަފުށްޓަށް ބަދަލުކުރުމަކީ އަޅުގަނޑުމެން މިހާރު ނިންމާފައިވާ ކަންތައް. ތިލަފުށީގައި އިރާދަކުރެއްވިއްޔާ އަޅުގަނޑުމެން ޤާއިމްކުރާނީ އިންޓަރނޭޝަނަލް ފުރިހަމަ ކޮމާޝަލް ޕޯޓް. އެތަނަށް އެ ގެނެވޭ ޑިވެލޮޕްމަންޓަކީވެސް އިރާދަކުރެއްވިއްޔާ މި އެއަރޕޯޓް ޑިވެލޮޕްމަންޓާ، މި ހުރިހާ ކަމެއް ގުޅިލާމެހިގެންދާއިރުގައި އަޅުގަނޑުމެން މި ތަޞައްވުރު ކުރާގޮތަށް، އެއީ، ރައްޔިތުން އެންމެ އެދޭގޮތަށް ޤާއިމްކުރެވިގެންދާ، އިޤްތިޞާދީ ގޮތުން ހުޅުވިގެންދާ ވަރަށް ފުޅާ ދޮރާށްޓެއް. އަދި ތިލަފުށީގައި މި ހިއްކޭ ބިމުގެ ތެރެއިން އަދި އެއާ ގުޅިފައިވާ ބިންތައް އެ ސަރަޙައްދުގައި ހިއްކޭ އެހެން ބިންތަކުގެ ބޭނުންކޮށްގެން، ރެސިޑެންޝަލް ޕަރޕަސްއަށް، ރައްޔިތުންނަށް ގެދޮރުވެރިކަމާއި، ބޯހިޔާވަހިކަމާއި، ބޭނުންވާ ހުރިހާ ކަމެއް ކަނޑައަޅާފައި، އިތުރަށް ހިއްކާ ބިމުން އިރާދަކުރެއްވިއްޔާ މިހާރު ކެބިނެޓުން ފާސްކޮށްފައި އަދި އެސްޓެބްލިޝް ކުރުމުގެ، ޤާއިމްކުރުމުގެ މަސައްކަތް ވަރަށް ބާރަށް ކުރިއަށްދާ، އަޅުގަނޑުމެންގެ އާ ކުންފުނި، އެއީ މި ދެންނެވި ފްރީ ޒޯން، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ކޮމްޕެނީ. އެ ކޮމްޕެނީ އިރާދަކުރެއްވިއްޔާ މި އަންނަ ހަފްތާގެ ކުރީކޮޅު ޤާއިމްކުރެވޭނެ. އެ ކޮމްޕެނީގެ ދަށުން ކުރެވޭ މަސައްކަތަށް 100 ވަރަކަށް ހެކްޓަރުގެ ބިން މި ދެންނެވި ސަރަޙައްދުން އަޅުގަނޑުމެން ކަނޑައަޅާނަން. ކަނޑައަޅައި ދެން އެ ފެށިގެން ދަނީ އިރާދަކުރެއްވިއްޔާ ރާއްޖެއަށް ބޭނުންވާ ހުރިހާ ބާވަތެއްގެ މެޓީރިއަލްސްތައް. އެއީ ކޮންސްޓްރަކްޝަން މެޓީރިއަލް ކަމުގައިވިޔަސް، އަދި ކާބޯތަކެތި، ރާއްޖޭގައި އުފެއްދޭ ބާވަތްތަކުގެ، އުފެއްދިދާނެ ބާވަތްތަކުގެ ހުރިހާ ކާބޯތަކެއްޗެއްގެ ބޮޑު އިންސައްތައެއް އުފެއްދުމާއި، މި ހުރިހާ ކަމެއް ހިމެނޭގޮތަށް. އަދި ރީ-އެކްސްޕޯޓް ކުރުމަށްޓަކައި ވަރަށް މުހިންމު ސްޓްރެޓީޖިކް ލޮކޭޝަނެއް ކަމުގައިވާތީ، އަޅުގަނޑުމެންނަށް ފަހިވެފައިވާ އެހެން ފުރުޞަތުތަކުގެ ބޭނުންހިފައި، ރީ-އެކްސްޕޯޓް ކުރެވޭ އިންޓަރނޭޝަނަލް އެސް.އީ.ޒެޑް ޒޯނަކަށް އެތަން ހެދިގެންދާނެ.
އެހެންވީމާ، މިހިރަ ކަންކަމަކީ އިރާދަކުރެއްވިއްޔާ، އަޅުގަނޑުމެންގެ އިޤްތިޞާދު ފުޅާކުރުމަށްޓަކައި ކުރަން ނިންމައި، އަޅުގަނޑުމެންގެ ހީވާގި ޓީމުން ކުރަމުންދާ މަސައްކަތް. މި ޓީމަކީ ވަރަށް ހީވާގި ޓީމެއް. ރެޔާއި ދުވާލު ހަމަ ލަފްޒީ މާނައިގައި ދަންނަވަންޏާ ދަނީ މަސައްކަތް ކުރަމުން. 24 ގަޑިއިރު ކަހަލަ ގޮތަކަށް. އަޅުގަނޑުމެން އިޤްތިޞާދީ މަސައްކަތަށް މި އިސްކަންދޭ މިންވަރަކީ، އިކޮނޮމިކް ކައުންސިލް، ދުވާލަކު އެއްފަހަރު އެބަ ބޭއްވޭ. ބައެއްފަހަރު ދުވާލަކު ދެފަހަރުވެސް އެބަ ބޭއްވޭ. މިއަދުގެ އިކޮނޮމިކް ކައުންސިލް ނިމުނީ މިރޭ 7 ޖެހިއިރު. ސޯޝަލް ކައުންސިލްވެސް ވަރަށް ގިނައިން އެބަ ބާއްވަން. ކެބިނެޓް ބައްދަލުވުންތައް ހަމަ ހަފްތާއަކު އެއްފަހަރު އެބަ ބާއްވަން. ކެބިނެޓްގައި އަޅުގަނޑު މި ކަނޑައަޅާފައި އޮތް ސްޕީޑްގައި ގެންދިޔުމަށްޓަކައި، ހަފްތާ 14 އަށް ކަނޑައަޅާފައި ހުރި ކަންތައްތައް ހާސިލުކުރުމަށްޓަކައި. ބާއްވަނީކީއެއް އެއްގަޑިއިރު، ދެ ގަޑިއިރުގެ ކެބިނެޓް ބައްދަލުވުމެއް ނޫން. އެވަރަކުން ނުފުދޭ. ދިވެހި ރައްޔިތުންނަށް ޙައްޤު މިންވަރަކީ އެއެއް ނޫން. އަޅުގަނޑުމެން ކަންކަން ގެންދަން މި ޓީމުން ހިތްވަރާއެކީ ކުރާ މަސައްކަތުން މުޅި ދުވަސް އެކީގައި އެބަ ހޭދަކުރަން ކެބިނެޓުން ކަންތައްތައް ނިންމަންވެސް.
އެހެންވީމާ، އަޅުގަނޑުމެން މިތިބީ ރައްޔިތުންނަށްޓަކައި ހިތްވަރާ އެކީގައި މަސައްކަތްކުރާ ހިތުން ނުކުމެ. އިރާދަކުރެއްވިއްޔާ ރައްޔިތުންގެ އުންމީދުތަކުގައި ޙަޤީޤީ ކުލަ އަޅުގަނޑުމެން ޖައްސައިދޭނަން. އެހެންވީމާ، މިއަދު މި އިޢުލާނު ކުރެވުނު މި ތަޞައްވުރު، މި އިޢުލާނުކުރި ސަބަބަކީ، ރައްޔިތުންނަށް އެބަ އެނގެންޖެހޭ، އަޅުގަނޑުމެން މިކުރަނީ ކޮން މަސައްކަތެއްކަން. އިންވެސްޓަރުންނަށް އެބަ އެނގެންޖެހޭ، އަޅުގަނޑުމެންގެ ވިސްނުން މި ގެންގުޅެނީ ކިހާހިސާބެއްގައިކަން. ޚާރިޖީ އެކިއެކި ފަރާތްތަކަށް ފަހުމްވާން އެބަޖެހޭ، މި ރާއްޖެއަށް ޙައްޤު މިންވަރަކީ ކޮބައިކަން.
އަޅުގަނޑުމެންނަކީ ދިވެހި ޤައުމުދެކެ ފަޚުރުވެރިވާ ބައެއް. ދިވެހި ރައްޔިތުންނަށް އެންމެ ފައިދާއާއި ލާބަހުރި ކަންކަން އެއީ، އަޅުގަނޑުމެން އިސްކުރާނެ ކަންކަން ކަން. އަޅުގަނޑުމެންގެ ޤައުމަށް އެންމެ ފައިދާހުރި ކަންތައްތައް ފަހިކޮށްދޭ ކަމަށްވާނަމަ، ޤައުމުގެ މިނިވަންކަމާއި އިސްތިޤްލާލް ޙިމާޔަތްވާކަމުގެ ޔަޤީންކަމާއި، އެ ހިތްހަމަޖެހުން އަޅުގަނޑުމެންނަށް ލިއްބައިދޭހާ ހިނދަކު، އެ ކޮންމެ ބަޔަކީ އަޅުގަނޑުމެންނާ ގާތް ބަޔަކަށްވާނެކަން، އެފަދަ ކޮންމެ ބަޔަކާ އެކީގައި އަޅުގަނޑުމެން މިތިބީ ފުރިހަމައަށް މަސައްކަތް ކުރަން ތައްޔާރަށްކަން ހުރިހާ ފަރާތްތަކަށް އެބަ އެނގެންޖެހޭ. އެއީ، އަޅުގަނޑުމެން މިތިބީ ދިވެހި ރައްޔިތުންނަށްޓަކައި މަސައްކަތް ކުރަން، ރައްޔިތުން ޒިންމާއެއް ހަވާލުކޮށްފައި.
އަޅުގަނޑަކީ އަދި އަޅުގަނޑުމެންގެ ޓީމަކީ، ރައްޔިތުންގެ ޓީމު. ރައްޔިތުންގެ ޚާދިމެއް އަޅުގަނޑަކީ. ރައްޔިތުން އަޅުގަނޑާ މަސައްކަތް ހަވާލުކުރީ. ޒިންމާ ހަވާލުކުރީ. މި ބުރަ ޒިންމާ، މި ބޮޑު އަމާނާތް ތެދުވެރިކަމާއި އަމާނާތްތެރިކަމާ އެކީގައި ރައްޔިތުންނަށް އަދާކުރުމަށްވުރެ އުފާވާ، ހިތްހަމަޖެހޭ ކަމެއް އަޅުގަނޑަކަށް ނެތް. އިރާދަކުރެއްވިއްޔާ އަޅުގަނޑުމެންގެ މުޅި ސަރުކާރުގެ މި ޓީމު، މުޅި ސަރުކާރުގެ ނިޒާމުގެ ތެރޭގައި ތިއްބެވި ހުރިހާ ބޭފުޅުންނާއި، ވިޔަފާރިވެރިންނާއި، އަމިއްލަ ފަރާތްތަކާއި އަދި މުޅި ދައުލަތުގެ ހުރިހާ އެންމެންގެ އެކުވެރިކަމާ އެކީގައި، ރައްޔިތުންނަށް ފައިދާހުރި ކަންކަން ކޮށްދޭނަން. އެހެންވީމާ، މިއަދު ބޭނުންވަނީ ރައްޔިތުންނަށްޓަކައި ރައްޔިތުން އެދޭގޮތަށް ކަންތައްތަކެއް ފަހިކުރުމުގައި އެންމެން އެކައްޗެއް ކިޔަން. އޭރުން އިރާދަކުރެއްވިއްޔާ އަޅުގަނޑުމެން މި އެދޭގޮތަށް އަޅުގަނޑުމެންގެ ކަންކަން ބައްޓަންވެގެން ދާނެ.
އަޅުގަނޑުމެން ހަމައެކަނި އަޅުގަނޑުމެންގެ ފަތުރުވެރިކަން މިހާރު މިއޮތް ވަރަށް ހަނިކޮށް ބާއްވާކަށެއް ކޮންމެހެން ނުޖެހޭ. ވިޒިޓަރ އިކޮނޮމީ ކައުންސިލެއް އަޅުގަނޑުމެން ހެދީވެސް އެ ބޭނުމުގައި. އަޅުގަނޑުމެންގެ ތާރީޚަކީ، ސަގާފަތަކީ ވަރަށް މުއްސަނދި ތާރީޚާއި ސަގާފަތެއް. އެ ތާރީޚާއި ސަގާފަތުގައި ހުރި ކަންކަން ދެނެގަތުމަށްވެސް ރާއްޖެއަށް ޓޫރިޒަމް ފުޅާކުރެވޭނެ. ތަޢުލީމީ ދާއިރާ އަޅުގަނޑުމެން ފުޅާކޮށްގެން، އަޅުގަނޑުމެންނަށް އެ ދާއިރާ މެދުވެރިކޮށްވެސް އަޅުގަނޑުމެންގެ އިކޮނޮމީ ފުޅާކުރެވެން އެބައޮތް. ވިޒިޓަރސްއިން ޓޫރިޒަމް ފުޅާކޮށްގެން އެކަން ކުރެވެން އެބައޮތް. ހެލްތު ޓޫރިޒަމް، ޞިއްޙީ ދާއިރާއިން، މިހެން ގޮސް އެކިއެކި ދާއިރާތަކުން، ކުޅިވަރުގެ ދާއިރާއިން. އެހެންވީމާ، އެކިއެކި ދާއިރާތަކުން މަސައްކަތް ކޮށްފިއްޔާ، އަޅުގަނޑުމެންގެ ޓޫރިޒަމް، އަޅުގަނޑުމެންގެ ޞިނާޢަތްތައް އެބައޮތް ކުރިއެރުވެން. އެހެންވީމާ، މި މަސައްކަތްތައް ކުރުމަކީ މިއަދު އަޅުގަނޑުމެން ވިސްނާ ކަންތައްތައް.
އަޅުގަނޑުމެންގެ ނެޝަނަލް އެއަރލައިން، އައިލެންޑް އޭވިއޭޝަންގެ މޯލްޑިވިއަނަކީވެސް މިއަދު ވަރަށް ހާލުގައި އޮތް ނަމަވެސް އިރާދަކުރެއްވިއްޔާ މި ކުރެވޭ މަސައްކަތުން ފަޚުރުވެރިކަމާ އެކީގައި ވަރަށް ފައިދާވާ، ރައްޔިތުން އެދޭފަދަ ޚިދުމަތް ދޭ ތަނަކަށް އަޅުގަނޑުމެން ހަދާނަން. ވައިޑް ބޮޑީ އެއަރކްރާފްޓް ގެނެސް، އަޅުގަނޑުމެން ބޭނުންވާ ގޮތަށް މުހިންމު ޑެސްޓިނޭޝަންތަކަށް އިތުރަށް އުދުހި، އަޅުގަނޑުމެން ބޭނުންވާ ފެންވަރަކަށް ޓޫރިޒަމް ފުޅާކުރުމަކީ، ފަތުރުވެރިކަން ފުޅާކުރުމަކީ، އެރައިވަލް އިތުރުކުރުމަކީ، އަޅުގަނޑުމެން މި ކުރަން ބޭނުންވާ މަސައްކަތް. އެ މަސައްކަތްވެސް އެދަނީ އިރާދަކުރެއްވިއްޔާ ވަރަށް ބާރު ސްޕީޑްގައި.
އެހެންވީމާ، މިފަދަ ހުރިހާ ކަމެއް ކުރުމަށް ރޭވިފައި މިވަނީ ރައްޔިތުންނަށް ފުރިހަމަ ފުދުންތެރިކަމެއް، ޖީބަށް އެ އަންނަންޖެހޭ ފުދުންތެރިކަން ގެނެސްދިނުމަށްޓަކައި. އިރާދަކުރެއްވިއްޔާ ކުދި ވިޔަފާރިތައް ފުޅާކުރެވުމަކީ، މި ކުރެވޭ މަސައްކަތުގެ ނަތީޖާއަކަށް ވެގެންދާނެ.
މިދިޔަ ކެބިނެޓް ބައްދަލުވުމުގައި އަޅުގަނޑުމެން މިވަނީ މެނިފެސްޓޯގައި އޮތް އެންމެ މުހިންމު އެއް ކަންތައް، ކްރިއޭޓިވް އިކޮނޮމީ ގާއިމު ކުރުމަށްޓަކައި ކުރަންޖެހޭ ހުރިހާ މަސައްކަތެއް ކުރުމަށް ނިންމާފައި. އެ މަސައްކަތް އެވަނީ ފެށިފައި.
އެހެންވީމާ، ޒުވާނުންނާއި، މަސައްކަތްތެރިންނާއި، އުފެއްދުންތެރިން އެއީ، ކޮންމެ ކަހަލަ ޓެލެންޓެއް ކަމުގައިވިޔަސް އުފައްދާ، މާކެޓްކޮށް، ވިއްކާ، އެއިން ނަފާ ހޯދައި، ވަރުގަދަ ކްރިއޭޓަރ އިކޮނޮމީއެއް ގާއިމުކުރުމަކީ، އަޅުގަނޑުމެން ފަހިކޮށްދޭނެ ކަންތައްތައް. މިކަމުގައިވެސް އެހީތެރިކަން ދޭންޖެހޭ ހުރިހާ ފަރާތެއްގެ އެހީތެރިކަން ބޭނުންވާނެ ޙަޤީޤަތުގައިވެސް. މަޖިލިސްތެރެއިން ދޭންޖެހޭ އެހީތެރިކަންވެސް ހުންނާނެ.
އެހެންވީމާ، މިހެން ހުންނަ ކޮންމެ ކަމަކީ، ޤައުމީ ވިސްނުމެއްގައި އަޅުގަނޑުމެން އެކައްޗެއް ކިޔަންޖެހޭ، އެއް ވާހަކައެއް ދައްކަންޖެހޭ ކަންތައްތައް. އޭރުން ފައިދާ މިވަނީ އަޅުގަނޑުމެންގެ އަމިއްލަ ނަފްސަށް. ދިވެހި ރައްޔިތުންނަށް. އެހެންވީމާ، ޒުވާނުންނަށްޓަކައި މި މަސައްކަތް ކުރާ މަގުތައް ފަހިކުރުމަކީ، އަޅުގަނޑުމެން އެންމެންގެ އަތްމަތީގައި އޮތް ޒިންމާއެއް މިހާރު. އެ މަސައްކަތް އެގޮތަށް ކުރުމުގައި ހުރިހާ ފަރާތްތަކުން އެއްބާރުލުން ދިނުމަކީ، އަޅުގަނޑު ނުހަނު އެދޭ ކަމެއް. އޭރުން ހުރިހާ ފަރާތްތަކަށް، އެއީ އަންހެނެއް ކަމުގައިވިޔަސް، ފިރިހެނެއް ކަމުގައިވިޔަސް، ނުކުޅެދުންތެރިކަން ހުރި ބޭފުޅެއް ކަމުގައިވިޔަސް، އިސް ރަށްވެއްސެއް ކަމުގައިވިޔަސް، މަސައްކަތެއް ކުރަން ބޭނުންވާ ކޮންމެ މީހަކަށްވިއްޔާ، އަމިއްލަ ފައިމައްޗަށް ތެދުވެގެން، އެމްޕަވަރ ވެގެން، ފަޚުރުވެރިކަމާއި، އަބުރުވެރިކަމާ އެކީގައި އުޅުމުގެ ފުރުޞަތު ލިބިގެން އެބަދޭ. އެއީ، އަޅުގަނޑުމެން ދެކެން މި ބޭނުންވާ ދުވަހަކީ. އެއީ އަޅުގަނޑުމެން އިރާދަކުރެއްވިއްޔާ ހާސިލުކުރަން ބޭނުންވާ ލަނޑުދަނޑިއަކީ.
އެހެންވީމާ، މި ކަންތައްތައް ކުރުމުގައި ދެބަސްވާންޖެހޭ ތަނެއް ނެތް. މި ކަންކަން ކުރުމުގައި އަޅުގަނޑުމެން އެންމެން އެކައްޗެއް އެބަ ކިޔަންޖެހޭ. އެކަތިގަނޑަކަށް ވުމަކީ އެއީ، ޤައުމަށްޓަކައިވާ އެކަތިގަނޑެއް. އެހެންވީމާ، މި ކަންކަމުގައި އެންމެން އެކައްޗެއް ކިޔައިގެން ކުރިޔަށް ދިޔުމަކީ، އަޅުގަނޑުމެން އެންމެން މިވަގުތު ނިންމަންޖެހޭ ނިންމުމެއް.
އުމްރާނީ ތަރައްޤީގެ ދާއިރާއިންވެސް އަޅުގަނޑުމެން މި ކުރާ މަސައްކަތްތަކަކީ، މިގޮތުން ކުރެވޭ ކަންކަން. އަޅުގަނޑުމެން މާލެ ކައިރީގައި މަސައްކަތެއް ފެށީމާ، އެކަމަކީ މާ މުހިންމު ކަމެއް ނޫންކަމަށް ދައްކަން ވާހަކަތަކެއް ދެއްކިދާނެ. އެހެންނަމަވެސް، އަޅުގަނޑުމެން ކުރާ ކޮންމެ ކަމެއް މި ދައްކަނީ ވަރަށް ސާފު ބަހުން، އެއްގޮތަކަށް އަބަދުވެސް. މުޅި ރާއްޖެ ތަރައްޤީ ކުރުމުގެ ޕްލޭނެއް އަޅުގަނޑުމެންގެ އިރާދަކުރެއްވިއްޔާ މިއޮތީ. އެންމެ އުތުރުން، އެންމެ ދެކުނުން، މެދުރާއްޖެތެރެއިން، ހުރިހާ ސަރަޙައްދުތަކެއް ތަރައްޤީ ކުރެވޭނެ. އެގޮތުން އައްޑޫ ސިޓީގައި ކުރަން ނިންމާފައި ހުރި ކަންކަމަކީވެސް ހަމަ ރައްޔިތުން ބޭނުންވެގެން، ރައްޔިތުން އަޅުގަނޑުމެން ގާތު އެދިފައިވާ ކަންކަން. އިރާދަކުރެއްވިއްޔާ ވަރަށް އަވަހަށް އައްޑޫގައި އެ ބްރިޖް އެޅުމުގެ މަސައްކަތަށް ބޭނުންވާ ފަންނީ އަދި ތަފްސީލީ ފީޒިބިލިޓީއާއި ޑިޒައިން މަސައްކަތް އަޅުގަނޑުމެން ބަޔަކާ ހަވާލުކުރާނަން. އޭރުން އެ ބްރިޖްގެ އަގު ކުރުމަށްޓަކައި ކޮންޓްރެކްޓެއް ހޯދައި، މަސައްކަތް ހަވާލުކުރުމަށްޓަކައި ނިންމަންޖެހޭ ހުރިހާ ލިޔެކިޔުމެއް އެ މަސައްކަތުން ފަހިވެގެން އެބަދޭ. ފުރިހަމަ ވެގެންދާނެ. އެހެންވީމާ، އެ މަސައްކަތްވެސް ވަރަށް އަވަހަށް ހަވާލު އެބަކުރެވޭ.
ހަމަ އެގޮތަށް، އެހެނިހެން ސަރަޙައްދުތަކުގައިވެސް އިންފްރާސްޓްރަކްޗަރގެ ދާއިރާއިން ކުރަން ނިންމާފައިވާ ކަންކަން މިދަނީ ވަރަށް ބާރު ސްޕީޑްގައި، އޭގެ ފުރަތަމަ މަރުހަލާގެ ކަންތައްތައް ކުރަމުން. އަދި މިވީ ސާޅީހަކަށް ދުވަސް ދޮގެއްތޯ، އަޅުގަނޑުމެން މަސައްކަތް ފެށިތާ. އެހެންނަމަވެސް، އަޅުގަނޑުމެން ބޭނުންވާ މިންވަރަކީ، މިކުރެވޭ މަސައްކަތަށްވުރެވެސް އިތުރަށް މަސައްކަތް ކުރަން.
އެހެންވީމާ، އަޅުގަނޑުމެން އިރާދަކުރެއްވިއްޔާ ރައްޔިތުންނަށްޓަކައި، ރައްޔިތުން އަޅުގަނޑުމެންނާ މި ހަވާލުކުރި ޒިންމާ ފުރިހަމައަށް އަދާކުރުމުގައި، ރައްޔިތުން ތިޔަ ދެއްވާ އެހީތެރިކަމާ އެކީގައި ކުރިއަށް ދާނަން. މިކަމުގައި އަދިވެސް އެއްފަހަރު، ހަމަ ވިޔަފާރިވެރިން، އެކި ފަންތީގެ ވިޔަފާރިވެރިން ދެއްވާ އެހީތެރިކަމަކީ، ވަރަށް ފާހަގަކުރާ ކަމެއް. ހުރިހާ އިޤުތިޞާދެއްގެ، އިޤުތިޞާދީ ހުރިހާ ޞިނާޢަތްތަކެއްގެ ހުރިހާ ބޭފުޅުން އެކުއެކީގައި މަސައްކަތް ކުރައްވައިފިއްޔާ، އަޅުގަނޑުމެންނަށް ކަންކަން ހާސިލުވެގެންދާނެ.
އަޅުގަނޑު ވަޢުދުވެފައި ހުރި ކޮންމެ ކަމެއް އިރާދަކުރެއްވިއްޔާ، އެ ވީ ވަޢުދާ އެއްގޮތަށް ކޮށްދޭނަން. ފަތުރުވެރިކަމުގެ ދާއިރާއިން މަސައްކަތްތެރިން އެންމެ ބޮޑަށް އެދުނު ކަންކަންވެސް ހަމަ ތަރުތީބު ކުރެވިފައި އޮތް ގޮތަށް ވަޢުދު ފުއްދަމުން ދާނީ. މި އަންނަ ހަފުތާގައި، ކެބިނެޓުގައި އިރާދަކުރެއްވިއްޔާ، އަޅުގަނޑުމެން މަޝްވަރާކުރާނަން އޭގެ ތެރެއިން އެއް ވަޢުދު. އެއީ، ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް ގެދޮރުވެރިކަމުގެ ޚާއްޞަ ކެޓަގަރީއެއް ގާއިމުކުރުމުގެ ވާހަކަ. އެއީ، ފަތުރުވެރިކަމުގެ އިންޑަސްޓްރީގެ މުވައްޒަފުން އެންމެ ބޮޑަށް އެދޭ އެއް ކަންތައް. އެހެންހުރި ކޮންމެ ކަމެއްވެސް އިރާދަކުރެއްވިއްޔާ އަޅުގަނޑުމެން އަމާނާތްތެރިކަމާއި، ތެދުވެރިކަމާއެކީގައި ރައްޔިތުންނަށްޓަކައި ފުއްދައިދެމުން ދާނަން.
އާދެ، މިރޭ އަޅުގަނޑު ހަމަ ދަންނަވާލަން ބޭނުންވަނީ މި ވާހަކަތައް. އެންމެން އެކީގައި ޤައުމުގެ ޙައްޤުގައި، ޤައުމު ކުރިއެރުވުމުގައި ހިނގާށޭ މަސައްކަތް ކުރަން. މިތަނުގައި މި ތަޞައްވަރުކުރި ޕްލޭނަކީ އެ ވާހަކަ. މިތާ މި ދެއްކި ޕްލޭން އިރާދަކުރެއްވިއްޔާ ރައްޔިތުންގެ ފުރިހަމަ އެއްބާރުލުމާ އެކީގައި، ހަމަ އަދިވެސް އެއްފަހަރު ދަންނަވާނީ، ޙަޤީޤަތަށް ހަދާނަމޭ. މިއަދުން ފެށިގެން މި ފެށޭ މަސައްކަތް ބާރު ސްޕީޑްގައި، މިހާރު އެ ހިނގާ މަސައްކަތް ހިނގަމުން ދަނިކޮށް، ބިން ހިއްކުންވިޔަސް، ސީޕްލޭން ޓަރމިނަލް ބަދަލުކުރުން ކަމުގައިވިޔަސް، ފުނަދޫގައި ހުރި ތެޔޮ ސްޓޯރޭޖް ބަދަލުކުރުން ކަމުގައިވިޔަސް، ދެން މިހެން ހުރި އެތައް ކަމެއް ތަރުތީބު ކުރެވިގެން، އެއަށް ބޭނުންވާ އިންވެސްޓްމަންޓަށް، އެއަށް ބޭނުންވާ އެކިއެކި ފައިނޭންޝަން ފެސިލިޓީޒްތައް ފަހިކޮށްގެން ފަށައި، ކުރިއަށް ގެންދާނަން.
އާދެ، އަދިވެސް އެއްފަހަރު، ހުރިހާ ބޭފުޅުންނަށް ވަރަށް ބޮޑަށް ޝުކުރު ދަންނަވަން. އަޅުގަނޑުމެން އެންމެން އެކުގައި މަސައްކަތް ކޮށްފިއްޔާ، އަޅުގަނޑުމެންގެ ޤައުމު އުޖާލާ މިސްރާބަކަށް ދާނެ.
އަޅުގަނޑުގެ ދުޢާއަކީ އަޅުގަނޑުމެން އެންމެން ގުޅިގެން މިކުރާ މަސައްކަތުގައި
اللهُ سُبْحَانَهُ وَتَعَالَى ބަރަކާތް ލެއްވުން! އަޅުގަނޑުމެންގެ މި ޤައުމަށް އަދަށްވުރެ ފަހި، ފާގަތި މާދަމައެއް މިންވަރު ކުރައްވާށި! އާމީން!
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.